| U pėrurua xhamia nė Dremen tė Norvegjisė |
|
|
 Më 15 dhe 16 maj 2010, në një manifestim solemn në Dremen të Norvegjisë, falë punës dhe aktivitetit të komuniteti shqiptarë, u bë inaugurimi i lokalit të adaptuar për xhami. Deri tek ky moment u arrit falë punës së palodhshme të xhematit të xhamisë që e udhëheq imami Bedri ef. Bashota. Në këtë solemnitet qe i pranishëm edhe kryetari i Qendrës Islamike Kulturore Shqiptare të Drammenit , Abedin Osmanit, pastaj shumë bashkatdhetarë nga Drammeni dhe rrethina si dhe udhëheqësit e bashkësive të tjera shqiptare nga Oslo, Haldeni dhe Sarpsborgu, etj. Ndërsa më madhështor këtë gëzim e bëri prania e delegacionit të BIK-së, të kryesuar nga kryeimami Sabri ef. Bajgora, i cilin shoqërohej edhe nga drejtori i medresesë “Alaudin” Bahri Simnica si dhe ligjëruesi në FSI, mr. Musa Vila. Fillimisht të pranishmëve iu drejtua, imami Bashota, i cili falënderoj e përshëndeti pjesëmarrësit i cili më pas fjalën ia dha, kryetarin Abedin Osmani, i cili, ndër të tjera, tha: ”Falënderojmë Zotin e Madh që na ka mundësuar ta blejmë dhe adaptojmë këtë lokal, i cili është vendtubim i shqiptarëve për t’u takuar e për të biseduar për të gjitha çështjet më rëndësi për kombin tonë”. Në fjalën e tij, kryeimami i Republikës së Kosovës Sabri ef.Bajgora, pasi përcolli përshëndetjet dhe urimet e Myftiut të Republikës së Kosovës – Mr. Naim ef Tërnava, i cili për shkaqe objektive nuk mundi të merrte pjesë në hapjen e kësaj xhamie, tha. “Kjo xhami është një vend i hajrit dhe është një sihariq i gëzueshëm për të gjithë ne, që vëllezërit tanë në Diasporë të kanë një vend ku do të vënë ballin në sexhde, një vend ku do të kenë takime për t’i qarë hallet njëri-tjetrit,për të bashkëbiseduar, për të edukuar fëmijët e tyre, sepse kjo është ajo që Allahu xh.sh. e derdh bekimin e vet mbi ju dhe mbi këtë vend duke ja lehtësuar jetesën tuaj këtu, mirëpo kryesisht duke ngarkuar në bagazhet tuaja sevape të shumta, që nesër do të jenë më se të nevojshme në rrugëtimin tonë të fundit në Ahiret” – Më tutje kryeimami Bajgora, tha se xhamia ka luajtur gjithnjë rolin kryesor në edukimin e brezave dhe lum ata që kanë kontribuar për këtë, ngase Allahu i Madhërishëm u ka premtuar pallate në Xhenet. Kryeimami Bajgora po ashtu siguroi se për çdo gjë që kanë nevojë, do të gëzojnë ndihmën e BIK-së. Ndërkaq Bahri ef. Simnica foli mbi rolin e imamit në mesin e popullatës, kurse Mr. Musa Vila foli rreth organizimit të bashkësive islame shqiptare në Evropë si nevojë e ruajtjes së gjuhës, fesë, kulturës dhe traditave shqiptare. Gëzonte fakti se në këtë manifestim ishin të pranishëm katër xhamitë shqiptare dhe imamët e tyre, të gjithë nga Kosova. Vizitë në xhaminë e Sarpsborg Më pastaj delegacioni, i shoqëruar nga drejtuesit e xhamive, vazhdoi rrugë për qytetin tjetër Sarpsborg, ku gjithashtu Bashkësia Fetare kishte blerë një lokal të ri. Imami i kësaj xhamie, Ardian ef.Haliti, pas prezantimit të mysafirëve, i ftoi ata që të falnin iqindinë e më pastaj të diskutonin për temat me interes për të pranishmit. Pas faljes së iqindisë, në mes xhematit dhe mysafirëve nga Kosova u shkëmbyen disa pyetje e përgjigje, që zgjuan interesimin e tyre, siç ishin: çështja e kohës së gjatë të ditës gjatë muajit të Ramazanit, pastaj lidhjet e BIK-së me qeverinë, edukata fetare etj. Në Oslo dua hatme Më 16 maj, delegacioni nga Kosova qëndroi në Qendrën Islamike Kulturore Shqiptare në Oslo, ku pati edhe dua hatmeje. Dhe, në fund, ata vizituan xhaminë e re, e cila me iniciativën e bashkatdhetarëve, është hapur para shtat muajsh. Edhe këtu të tre mysafirët mbajtën nga një ligjërim të shkurtër, shoqëruar me pyetje nga ana e xhemantlinjve, sidomos për sa i përket mbrojtjes së imamëve nga BI-ja si dhe pyetje të tjera. Delegacioni u prit me ngrohtësi në të gjitha xhamitë dhe premtoi për përkrahje e ndihmë me literaturë dhe me gjithçka është e mundshme. Mbesim me shpresë që në vizitat e ardhshme sukseset të jenë edhe më të mëdha. Delegacioni vizitoi edhe xhaminë e pakisatnezëve me dy minare, që është nga xhamitë më të mëdha në Norvegji. |
| < I mėparshmi | Tjetri > |
|---|